Filò

Pin penin
valentin
pena bianca
mi quaranta
mi un mi dói mi trèi mi quatro
mi sinque mi sie mi sète mi òto
buròto
stradèa
comodèa –

Pin penin
fureghin
perle e filo par inpirar
e pètena par petenar
e po’ codini e nastrini e cordéa –

le xé le comedie i zoghessi de chéa
che jeri la jera putèa

Pin pidin
cossa gastu visto?
‘Sta piavoleta nua
‘sto corpesin ‘ste rosete
‘sta viola che te consola
‘sta pele lissa come séa
‘sti pissigheti de rissi
‘sti oceti che te varda fissi
e che sa dir “te vòi ben”
‘ste suchete ‘sta sfeseta –

le xé le belesse da portar a nosse
a nosse conposte de chéa
che jeri la jera putèa

Pin penin
valentin
o mio ben,
te serco intel’l fogo inte’l giasso
te serco e no ghe riesso
te serco e no ghe la fasso,
pan e dedin
polenta e nasin –
chi me fa dormir
chi me fa morir
tuta pa’l me amor
chi me fa tornar
coi baseti che ciùcia
coi brasseti che struca
co la camiseta più bèa –

le xé le voje i caprissi de chéa
che jeri la jera putèa

Pin pidin
valentin
pan e vin
o mio ben,
un giosso, solo che un giosso,
te serco drento inte ‘l masso
te serco fora dal masso
te serco te serco e indrio sbrisso,
chi xé che porta ‘l mio ben
chi me descanta
chi me desgàtia
chi me despira,
pan e pidin
polenta e nasin
polenta e late
da le tetine mate
da le tetine beate –

i xé i zoghessi de la piavoleta
le xé le nosse i caprissi de chea
de chéa
che jeri la jera putèa.