Versi e poesie

‘Avèssimo ‘avùo pietà de le bele!,
Del piaçer, e no’ del dolor,
Che i corpi dimostra.

‘Avèssimo ‘avùo pietà dei più forti!,
De chi sofre de più.

Sarèssimo forse, ancùo, un fià più forti
Nù stessi;

No’ andarèssimo vìa in giro, pianzendo,
Zigando;

Ascoltarèssimo el pianto dei altri:

No’ firmarèssimo tuto el dolor
De ‘sto mondo
Coi nostri picoli nomi.

‘Na lodola zogava.
‘Na lodola volava.
‘Na lodola cantava.
Ma no’ la xé più qua.

Dove sìstu lodoleta?
Dove sìstu incantadòra?

O sìstu qua, viçin de mì,
Fra ste rame, e imaginando,
Dopo tanto cantar,
Solo tuo el to silenzio?

Lodoleta, no’ xé vero.

Dove i me versi me portarìa,
Acarezandoli come voialtri,
No’ so fradeli.
Tocadi i limiti del me valor,
Forse mi stesso me inganarìa,
Crederìa sacra l’arte, e la gloria,
Più che l’onor.

O forse alora mi capirìa,
Megio d’ancùo, più dentro in mi,
Quelo che i versi no’ pol mai dar.
Pur no’ savendo esser un santo,
A testa bassa de fronte ai santi,
Par la me ànema mi pregarìa,
No’ più ascoltandome nel mio pregar.

Gh’è nei to grandi – Oci de ebrea
Come una luse – Che me consuma;
No’ ti-ssì bèla – Ma nei to oci
Mi me vergogno – De aver vardà.

Par ogni vizio – Mio ti-me doni
Tuta la grazia – Del to bon cuor,
A le me vogie – Tì ti-rispondi,
Come le vogie – Mie fusse amor.

Sistu ‘na serva – No’ altro o pur
Xé de una santa – ‘Sta devozion?
Mi me credevo – Un òmo libero
E sento nascer – In mi el paron.

Vero xé forse – Che in tuti i santi
Gh’è un fià de l’ànema – Del servidor,
Ma forse, proprio – Par questo, i santi
No’ se pardona – Nel mondo amor;

No’ i canta, insieme – Co’ done e fioi,
Intorno ai foghi, – «El pan! El vin!»,
Co’ more l’anno – Nei me paesi,
Se prega un altro – Anno al destin;

Secondo el fumo – Che va col vento,
Scominzia i vèci – A profetar...
«O scarso, o grando, – Ne sia el racolto,
Sperar xé tuto – E laòrar».

Cussì mi vivo – Zòrno par zòrno,
Come un alegro – Agricoltor,
Vùi destraviarme – Vardarme intorno,
Méter un voto – Fra mi e ‘l Signor...

Ma nei to grandi – Oci de ebrea
Ghe xé una luse – Che no’ pardona;
Tì-ssì una santa – E nei to oci
No’ vùi più creder – Che gò vardà.

Gò lassà cascar una rosa nel mar,
Stravià che gèro!
La gò çercada po’ un toco e vardando
Ogni giossa portava una rosa,
Tuto el mar me se xé parfumà.

Ah el profumo del mar no’ se pol
Portarselo via!
Forse più me valeva una rosa.
Forse i omeni ingenui val più
Che un poeta.
Mi son l’amigo de tuti nel mondo,
E de tuto.
De mi stesso, no.

Massa vecio par tì. Ti-ssì ‘na dona
Torturada dal çiel nei so pecai.
E varda: una putela vien a mi.

No’ ghe vol manco par mi, che me son fato
D’ogni dubio un dover,
Che ‘ste man nove,
Dolze conca ai me lavri in ogni fiume,
Che pur vedo viçin,
Ma quanta strada,
Senza quel creder pronto,
Dai lavri a l’aqua!

Ah lassa, amiga vecia, una putèla
Vignér a mì!

O savaréssistu anca tì darme una fede,
Una fede imensa
Contro el me razonar?

Mi son ‘na ssé:
No’ çerco un’altra ssé.

Nei momenti che i basi fermemo
No’ par gusto ma par riflession,
La me amante voi scriver i versi,
Che mi digo e me basta de dir.

Tuta nùa la se méte al lavoro,
Po’ la méte una blusa lisièra,
Po’ la ziga «che fredi xé i versi»
La stranùa, mi la baso, e bondì.

«Ah che curti che xé ‘sti poemi!»
Dirà queli che ne lezerà,
«Ah che boni che gèra quei basi!»
Dirà ela... o Amor lo dirà.

Par vardàr dentro i çieli sereni,
Là sù sconti da nuvoli neri,
Gò lassa le me vali e i me orti,
Par andar su le çime dei monti.

Son rivà su le çime dei monti,
Gò vardà dentro i çieli sereni,
Vedarò le me vali e i me orti,
Là zó sconti da nuvoli neri?

Parole scrite d’amor zogàe, vendùe,
Gavèsse ‘vùo ‘na dona un solo zorno
Che ve gavèsse par amor capìe,

No’ ‘varìave, no’, scrite nè ditàe
Mie parole d’amor.

Donàe, donàe ve gavarìa
E perse volentiera.

Portème vìa, portème vìa, toseti!
Alzé i remi, voghé, portème vìa!
Più in là ve butaré, toseti e tose,
Tuti nùi, par nüar, no’ par vardarve.

Ve vardarò ben mì, credo, e un fià più
Le tose che i tosi. Ma no’ sarò
El vecio che son. Nel gran mar de sti ani
Cussì presto passai, ritornarò
El toseto che gero.

No’ saré vù, no’ saré vù, in quel mar!

Soldi, soldi, vegna i soldi,
Mi vùi venderme e comprar,
Comprar tanto vin che basti
‘Na nazion a imbriagar.

Cantarò co’ lori i beve,
Bevarò se i cantarà,
Imbriago vùi scoltarli,
Imbriaghi i scoltarà.

Ghè dirò ‘na paroleta,
Che ghe resti dopo el vin,
Fioi de troie, i vostri fioi,
Gavarà ‘l vostro destin.

Soldi, soldi, vegna i soldi,
Mi vùi venderme e comprar,
Comprar tanto vin che basti
‘Na nazion a imbriagar.

Un giorno o l’altro mi tornarò,
No’ vùi tra zénte strània morir,
Un giorno o l’altro mi tornarò
Nel me paese.

Dentro le pière che i gà inalzà
Su le rovine, mi cercarò,
Dentro le pière che i gà inalzà,
Le vecie case.

Sarò pai zóveni un forestier,
Che varda dove che i altri passa,
Sarò pai zóveni un forestier,
No’ lori a mi.

Carghi dei sogni dei me vint’ani,
Vedarò i burci partir ancora,
Carghi dei sogni dei me vint’ani,
Dal Piave al mar.

Cussì che in ultimo mi no’ starò,
Coi altri vèci intorno al fògo,
Cussì che in ultimo mi no’ starò
A dir «noialtri...».

E a un dei tósi che andarà via,
Voltando i òci de nòvo al porto,
E a un dei tósi che andarà via,
Ghe darò el cuor.