El vento dell’eterno se fa teso

El vento la porteva su dal siol
la nuvola spumosa
color de l’oro e rosa
in viaso verso ‘l sol.

Ma pùo, per via,
‘i xe vignùo manincunia
e vogia de calâ lisiera
sul verde de la tera.

Comossa del so calo,
la pianzusseva sita,
co’ nel cuor una fita,
per quel so dolse falo

che ‘i toleva la luse e l’oro
e quel andâ de svolo,
nel sielo più profondo,
alta sul mondo.

Ninte no xe passao
e duto vive e xe presente;
un sielo solo levante e ponente,
un solo sol m’ ha iluminao.

I primi vogi che m’ ha inamorao
xe quii che ‘desso rìe
e infinite restìe
basa dì e note el lio de Grao.

Ogni geri xe incùo
ansi xe adesso,
ogni vento xe el messo
de Dio, nel sielo de velùo.

E ninte mai more
nel mondo:
un solo, ma fondo
xe ‘l corso de l’ore.

La mutassion origina el canto;
no ‘vê paura de sparî;
dura un atimo el dì
ma xe eterno l’incanto.