Ninte no xe passao

Ninte no xe passao
e duto vive e xe presente;
un sielo solo levante e ponente,
un solo sol m’ ha iluminao.

I primi vogi che m’ ha inamorao
xe quii che ‘desso rìe
e infinite restìe
basa dì e note el lio de Grao.

Ogni geri xe incùo
ansi xe adesso,
ogni vento xe el messo
de Dio, nel sielo de velùo.

E ninte mai more
nel mondo:
un solo, ma fondo
xe ‘l corso de l’ore.

La mutassion origina el canto;
no ‘vê paura de sparî;
dura un atimo el dì
ma xe eterno l’incanto.