Soto ‘l sole de lugio

Soto ‘l sole de lugio, duto un fogo,
‘ndeveno sul dosso a catâ scusse
e gera quel el nostro zuogo
aconpagnào del mar co’ le vosusse.

Ogni scussa una zogia,
un sigâ forte e un rîe,
un mostrâla a cololtro, per fâ-’i vogia,
e un côre sul sabion, lisieri i pìe.

Le scusse adesso le xe dute qua,
che le favela forte dei to sini,
modulài da la luse de l’istà,
dai vinti frischi e i basi matutini.

No’ tu vol più sentîle?
Le sa cantâ, le sa basâ valìe,
le ha boche luminose e pur sutile,
e, comò tu, cô vien el sol, le rìe.