Ultimo sol

Un soliselo
comò convalessente;
un sielo smorto
sbiancào qua e là de vili;
rami nigri sutili
verso l’alto
a vantâ l’ultimo seleste;
in basso, quel zalo canarin
che rìe su case meste
a pena a pena.

Un’aria ciara serena
sensa sogni o ilusion,
sensa zogia e sensa passion,
comò l’ánema za destacagia;
aria linpida, in pase,
mossa apena da un fiào de burin,
da l’ale de do passaroti
che zuoga sora un camin;

vogi fissi che varda,
ánema ferma che tarda
per l’ultima luse
sensa canti e sensa firminti,
sfinìa comò sera de véro
sutilo lisiero
trasparente perchè sensa mistero.
Solo ocio che veghe.