Hélinand de Froidmont

… Morz fait a chascun sa droiture,
Morz fait a toz droite mesure,
Morz poise tôt a juste pois,
Morz venge chascun de s’injure,
Morz met orgueil a porreture,
Morz fait faillir la guerre as rois,
Morz fait garder decrez et lois,
Morz fait laissier usure et crois,
Morz fait de soëf vie dure,
Morz as porees et as pois
Donne saveur de bon craspois
Es cloistres o l’en crient luxure.

Morz apaise les ennoisiez,
Morz acoise les envoisiez,
Morz totes les meslees fine,
Morz met en croiz toz faus croisiez,
Morz fait droit a toz les boisiez,
Morz toz les plaiz a droit termine,
Morz desoivre rose d’espine,
Paille de grain, bren de farine,
Les purs vins des faus armoisiez ;
Morz voit par mi voile et cortine,
Morz seule set et adevine
Com chascuns est a droit proisiez…