Ballade

Dame, de qui toute ma joie vient,
Je ne vous puis trop amer ne chérir,
N’assez loër, si com il apartient,
Servir, douter, honnourer n’obéir ;
Car le gracieus espoir,
Douce Dame, que j’ay de vous veoir
Me fait cent fois plus de bien et de joie
Qu’en cent mille ans desservir ne porroie.

Cil dous espoirs en vie me soustient
Et me norrist en amoureus désir,
Et dedens moy met tout ce qui convient
Pour conforter mon cuer et resjoïr ;
N’il ne s’en part main ne soir,
Ainçois me fait doucement recevoir
Plus des dous biens qu’Amours aux siens ottroie,
Qu’en cent mille ans desservir ne porroie.

Et quant Espoir qui en mon cuer se tient
Fait dedens moy si grant joie venir,
Lointains de vous, ma Dame, s’il avient
Que vo biauté voie que moult désir,
Ma joie, si com j’espoir,
Ymaginer, penser ne concevoir
Ne porroit nuls, car trop plus en aroie
Qu’en cent mille ans desservir ne porroie.