Lu pettu

Ntra ssu pittuzzu amabili,
ortu di rosi e ciuri,
dui mazzuneddi Amuri
cu li soi manu fa.
Ci spruzza poi cu l’ali
li fiocchi di la nivi,
’ntriccia li vini e scrivi:
Lu paradisu è ccà.

Ma un’importuna nuvula
m’ottenebra lu celu:
appena ntra lu velu
na spiragghiedda c’è.
Armata d’una spìngula,
chi pari na laparda,
modestia si lu guarda:
ch’è rigurusa, ohimè!

Un Amurinu affabili
l’ammutta a jiri a mia,
ma l’àutru, oh tirannia!
turnari poi lu fa;
pietusu a li mei lagrimi,
chiddu lu spinci arrèri,
ma torna poi ’nnarrèri,
e sempri veni e va.

Li sguardi si sammuzzanu
ntra dda spiragghia nica,
ed idda li nutrica,
li pasci quantu pò;
idda la menti guida
a li biddizzi arcani,
nni teni vivi e sani
lu sulu aiutu so.

Si mai sintisti affettu,
o Zefiru amurusu,
lu velu suspittusu
allarga un pocu chiù;
e si lu to nun basta
alitu dilicatu,
pìgghiati lu miu ciatu,
e servitìnni tu.