Lu sistema sessuali di li ciuri di lu celebri Linneu

Nici, sai pirchì stu ciuri,
chi sta sutta la tua gorgia,
tanta pompa e lussu sforgia
di fraganzi e di culuri?

Pirchì è un lettu nuziali,
chi natura à preparatu
a na zita ch’avi allatu
deci spusi in fiocchi e in gali.

Vidi quantu sù galanti
l’apparati, li curtini!
Quantu vaghi, quantu fini
sù li rasi di li canti!

Tra na conca chi c’è ’mmenzu
sta la spusa, e ogni maritu,
aspittannu lo so invitu,
a l’abbrazzi è già propenzu.

Tra li palpiti amurusi
si distilla la ducizza,
chi si cogghi a stizza a stizza
poi da l’api industriusi…

Ma tu canci, ohimè, d’aspettu!
Tu ti copri di russuri!
Nun è chistu, ah no, lu ciuri,
chi conveni a lu to pettu!

Eccu ccà chist’àutru: osserva,
ccà c’è sula na spusina,
chi na pura ciamma fina
per un Zefiru cunserva.

Iddu parti all’alba avanti,
e radennu prati e lidi,
tra li ciuri si providi
di l’essenzi fecundanti.

Senza pausa scurri, e in fretta
movi l’una e l’àutr’aluzza,
e amurusu poi li spruzza
su la spusa chi l’aspetta.

Vidi comu a lu so ciatu,
idda s’anima e ravviva?
Nici, apprendi a quantu arriva
un amuri dilicatu!

Ed ammira, o cori miu,
jetta l’occhiu a tutti banni:
quant’estisu, quantu granni
è l’imperiu di stu Diu!