Da La Betìa

O dolze e bela serore,
o uoci de sole inrazè,
o massele inverzelè
pi che no fo mé basta o persuto salò,

o lavri rosé, o biè dinti da ravolò,
o boca inmelata,
a’ dighe, anzelicata,
de robini e d’ariento,

o tete, a’ fassè pur contento
per grandeza ogni vacaro,
o piè biè grande da vetolàro,
o gambe grosse ben norì, o bel lacheto,

tondo, grosso, bianco e neto,
che ogni botazo è picolo a pè de ti!
Chi no starae mo tri dì
per vêrte da magnare?

O spale da portare
oltra el mare Missier Domenedio,
o pieto bianco e scolorìo,
com fo mé ravo in campo,

o corpo giusioso e santo,
o braze ben da sapa o da baìle,
o man da lavorar ben mile
bughè int’un dì,

o scureguzo, o cotaleta…
ch’ a’ no vuò dir pì!
Me volìu mo agiare,
o volìu lagarme crepare?