Cale del Volto
Cale del Volto gera un’aventura:
la scuminsieva un giosso de canpielo,
co’ un balaor de fianco, su la destra.
Per la scala ‘ndeva sù ‘na creatura
duta nùa comò un anzolo del sielo.
In fondo, ‘na pergola de vida
decoreva la porta d’una casa;
la rinfrescheva la piasseta grisa
fagando de suàsa.
Da cu sa indola in giro
vigniva fresco un bel cantâ disteso,
che ‘l deva sol a duta la contrada.
Gera oltre volte un sigo o una riàda
d’un bel geranio rosso vivo.
El largo ‘l ‘veva ‘l spássio d’un curtivo,
col saliso seren, valìo dai pìe,
e da le carne fantuline.
A sinistra più avanti, in fondo, gera,
drìo un riquadro sensa ante, un curtiveto.
Là cresseva, ben sconta, una fighera,
la maravegia del curtivo queto.
E un barconusso se vegheva in fondo,
co’ vanpe vive drento la curnisa;
fra barcon e fighera una camisa
ciapeva ‘l sol, sora una corda tesa.
La cale qua gireva e se vegheva el volto;
oltri curtivi, drìo le porte in sfesa,
oltre case in ascolto.
Anche una botegussa de sartor
col rumor de la machina che cûse,
e púo, la luse d’un oltro balaor.
Qua finiva la storia del gno amor.
Cô vignivo de tu
Cô vignivo de tu pioveva stele,
e tante ne ‘nsunevo
che l’ánema gera un firmamento;
comò un supio de vento
noturno vignivo!
Te le metevo adosso a una a una,
sui fianchi persuasi,
co’ tanti mai basi,
da fâ ‘na sintura.
Te le ghitevo in cuor e nel sangue,
a stiochi, a grande refolade:
le scoreva in fiumere,
in cressenti, in dosane,
le vanpeva in caldane
de sere
d’istàe,
le rièva sovrane
in duti i to dinti splindinti,
nel vogio to moro.
E in fin tu geri in fiame,
un fogo belo e grando,
che bruseva ‘l gno cuor
e la to vita intiera,
boca mia bela
che senpre incòra vago recordando.
El canal de la Vergene
I
Sogna ‘l canal co’ l’aqua trasparente;
in fondo, un prao d’àleghe verdine.
Passa de sora, calma, la corente,
la piega dute l’erbe veludine.
Fra l’àleghe bianchisa ‘l to viseto,
cussì palido, cara, e cussì quieto.
Le t’ha coverto ‘l to bel corpo nuo
dondolandote adosso ‘l so veluo.
II
Ma no tu dormi: tu par sempre svegia
co’ quii to vogi in fondo spalancai
comò per una granda meravegia
che te fa mal e no te lassa mai.
L’erbe le ha messo sul to corpo nuo
una coverta viva de veluo;
ma quii to vogi d’aqua trasparente
nissun li sera più – eternamente.
El vento la porteva su dal siol
El vento la porteva su dal siol
la nuvola spumosa
color de l’oro e rosa
in viaso verso ‘l sol.
Ma pùo, per via,
‘i xe vignùo manincunia
e vogia de calâ lisiera
sul verde de la tera.
Comossa del so calo,
la pianzusseva sita,
co’ nel cuor una fita,
per quel so dolse falo
che ‘i toleva la luse e l’oro
e quel andâ de svolo,
nel sielo più profondo,
alta sul mondo.
Fa sera e la silisa
Fa sera e la silisa
la me conpagna in svolo;
la sera mia s’ingrisa,
ma la silisa
no’ la me lassa solo.
La svola senpre sita,
ma cô ‘l cuor me se amala,
quel’ala che se cala
e mai nel svolo fala,
la me conserva in vita.
La xe solo un’osela
che a vespero, de sera,
la xe vignùa lisiera
a fâme primavera
qua drento la gno cela.
L’ora granda
Xe ferme l’aque che le par speciera:
drento le ha ‘l siel co’ garghe nuvoleta:
là sui árzini alti fa l’erbeta
che ‘l silensio valisa a so maniera.
Lontan, de là de le marine e i dossi,
un respirâ del mar solene e largo;
un svolo a l’orizonte, a mar, de ciossi
e più lontan un bastimento cargo.
El sol va in alto: l’aqua xe un brilante
co’ foghi virdi e sangue de rubini,
e svola in sielo l’órdola a scalini
per dî ‘l so ben al dolse amor distante.
‘Desso ‘l silensio drento l’aria trema
e la zogia fa môve i fili d’erba:
adesso la mantina xe superba
de la luse che duta la diadema.
E me son l’aqua che fa specio terso
e l’órdola che canta ‘l sovo ben,
e me son l’aria e son el canto perso
che fa tremâ fin l’erba sul teren.
La gno fantulina
La gno fantulina
l’ha un rîe d’arzento,
e su la nuca nùa
color de l’ùa
un risso d’oro
che xe un tormento.
L’ha quindese ani:
un supio de vento!
La gola cantarina;
sera e mantina
un canto solo,
che xe un tormento.
Le ultime ricele
Le ultime ricele
l’hè tolte zo per zuogo
co’ ‘l ponente za in fogo
e a levante le stele.
Pochi grani dulsìi
da la longa stagion,
savorusi de bon,
d’arumi za sfinìi.
La pergola xe rossa
e za le fogie cage
dal vento persuase
co’ ‘na picola scossa.
Me ‘speto senpre, ‘speto incora
Me ‘speto senpre, ‘speto incora,
che fassa l’alba, che fassa aurora,
e che la vegna a dâme un baso,
a ufrîme el so geranio in vaso,
prima che ‘l nuòlo incora rosso
de l’ultima zornâ sia disparìo,
sora del lìo,
sora del dosso.
Xe za l’ultima ora:
la score calma e sita,
la porta via la luse de la vita,
e me son qua che ‘speto incora.
Ninte no xe passao
Ninte no xe passao
e duto vive e xe presente;
un sielo solo levante e ponente,
un solo sol m’ ha iluminao.
I primi vogi che m’ ha inamorao
xe quii che ‘desso rìe
e infinite restìe
basa dì e note el lio de Grao.
Ogni geri xe incùo
ansi xe adesso,
ogni vento xe el messo
de Dio, nel sielo de velùo.
E ninte mai more
nel mondo:
un solo, ma fondo
xe ‘l corso de l’ore.
La mutassion origina el canto;
no ‘vê paura de sparî;
dura un atimo el dì
ma xe eterno l’incanto.
