Alla madre priora
Mo che Diavolo feu, Madre Priora,
che tutto ’l zorno fé sì gran schiamazzo,
chiamar el Zardinier, palparghe ’l Cazzo,
e pò sborar cinque, o sìe volte all’ora?
Farve ben sfregolar sotto, e de sora,
zuppegarve le tette, e quel solazzo
de dormir nel zardin nua sul stramazzo,
mo che Diavolo feu, Madre Priora?
Xela questa l’usanza del Convento,
sgangolir per el Cazzo del fattor,
e menarve la Mona ogni momento?
Bisogna dir che gabbié assae calor,
volerlo zorno e notte sempre drento,
e pò diré che ’l crìa el Confessor.
Documenti per ben fottere
Senti come el me tira, Anema cara,
senti come el te và drento in la Cocca,
dame presto la lengua drento in bocca,
no esser dei to basi tanto avara.
Deh! Tiolo tutto, strenzi, e avanti para;
sò che con altri no ti è stada alocca,
no far gnanca co mi tanto la gnocca,
a darla tutta, e a retirarla impara;
alza el Culo, mio ben, fà la mattona
in strenzerme, e saltar, o mio Tesoro,
strenzime coi to brazzi, se ti è bona.
Vià, cara, vìa, son quà, oh! Dìo, che moro,
dame le Tette, e ’1 Cul, spenzi la Mona,
sbora, sbora, mio ben; oh Dio! mi sboro.
Fotte una donna sul letto
T’hò pur trovà sul letto
despoggiada, oh! Dìo, che gusto,
poderte senza busto
le Tette ben palpar.
Lassa che la camisa
te leva un poco suso,
che della Mona el buso
mi possa contemplar.
Che carne, che bianchezza,
che Collo, oh Dìo, che Tette!
Che cosse morbidette,
che Culo molesin!
Che brazzi, oh Dio, che fianchi!
Che panza, dove in fondo
ghe xe un peletto biondo,
che pare un perucchin!
Via slarga quelle cosse,
averzile, via, pronta,
no me tegnir più sconta
la Regia dell’amor.
Care le mie raise,
perché mai vergognarte,
che veda quella parte,
che me consola el cuor?
Da quel morbido pelo,
che ti hà sul Pettenecchio,
vedo, come in un specchio,
el centro d’ogni ben.
Ancora ti resisti,
ti tremi, che te fotta?
Perché tanto te scotta
darme quel che me vien?
Mi ’l sò, ceder ti vuol,
ma ti ’l vuol far costretta,
acciò che mi tel metta
con più ferocità.
Ecco quel liogo, dove
amor tien quel solazzo,
che fà provar al Cazzo
la so felicità.
Mi vedo do Lavretti
morbidi, che i se tocca,
che fà che quella bocca
la gabbia del Divin.
Oh! Quando che i se averze
cosa me mostra amor,
oltre quel bel color,
che supera el rubin!
Voi doperar quell’arma,
che per la bella lotta
da farse colla potta
natura m’hà formà.
Cara, e chi puoi spiegar
el gusto, che mi sento!
Quando con te son drento
son tutto imbalsemà. (…)
Gnente meggio del fottere
Fottemo pur, fottemo allegramente,
che del fotter no ghè cosa più bona,
troveme un liogo meggio della Mona,
nol ghè per Dio, che diga pur la zente.
Le nostre voggie no xe mai contente,
se vorrìa co xe dì, che fusse nona,
ma, co se xe a cavallo d’una Dona,
voggia de desmontar mai no se sente.
In fatti, se l’Osello no molasse,
no ghe sarìa gnessun de volontà,
che fora della Mona lo cavasse;
perché ’l se cava in quanto el s’hà molà,
che per altro, se sempre duro el stasse,
mai nol se cavarìa fora de là.
Gusto del chiavar
No digo che no sìa gusto a toccar
un bel Culo de qualche buzarona,
che no sìa gusto de toccar la Mona,
che no sìa gusto a farselo menar.
Colla so lengua in bocca de sborar
no digo no la sìa ’na cosa bona,
in somma tutto quel che co ’na Dona
de più lascivo al Mondo se puol far.
Xe tutti quanti gusti bei, e boni,
ma quello del chiavar per mi sostento
che ’l sia un gusto trà i gusti buzaroni,
perché quando che in Mona se xe drento,
de tutto el Mondo par se sìa paroni,
e tutto se darìa per quel momento.
Loda ’l cul de Donna Cate
La biaca è un negrofumo in paragon
del vostro bianco Cul, Madonna Cate,
le vostre candidissime culate
fà che ’l zesso più fin para carbon.
No occorre miga che se tegna in bon,
dove che xe sto Cul, l’avorio, e ’l late;
l’alabastro più fin, le nevi intate
cede tutti a sto Cul la so rason.
Le colombe xe negre, i cigni mori,
se el Zensamin, e ’l Ziglio se trovasse
dov’è sto Cul, no ì parerìa più fiori.
Se i gavesse sto Cul tanti Bardasse
i poderava guadagnar tesori;
ma più bello el sarìa, se nol cagasse.
Loda ’l culo d’una ragazza
In ti, Ninetta mia,
tutto xe bon, perfetto,
la Mona, el viso, el petto,
quanto se puol trovar;
ma lassa che tel diga,
sora de tutto hà merito
in tì quel bel preterito,
che al Mondo no gà par.
Se un forastier arriva
in sta Città ghe trova
sempre bellezza nova
per tutto, dove ’l và.
La spesa dei palazzi
lo incanta, e lo confonde;
e una Città sull’onde
innamorar lo fà.
El ponte de Rialto
ghe fà innarcar le cegie,
el vede maravegie
nel ziro del Canal.
Ma, quando della piazza
el bel se ghe presenta,
estatico el deventa,
e nol ghe trova egual.
Cussi in tì, mia Ninetta,
me piase el guardo, el riso,
el bel color del viso,
la grazia del parlar.
In ti tutto xe brio,
ma, quando arrivo al cesto,
tutto me scordo el resto,
né meggio sò trovar.
Ghe dago cento nomi,
ghe digo le roane,
puine Padoane,
grazioso girasol,
Nìo de galline, e d’anare,
dove le suol far vovo,
e i più bei nomi trovo,
che immaginar se puoi.
Lode al culo
Oh! Bus del Cul, che tra do Colinette
in circolo ti xe tondo, e perfetto,
un vaso ti me par pien de zibetto
messo in conserva in quelle to grespette.
Ti me par un melon taggià in do fette;
che vegna anca el più celebre architetto,
per Dio, che nol puol far più bel groppetto,
che con Natura l’Arte no se mette.
Oh caro Culo! Oh macchina stupenda!
Gran cose in ti se vede in un momento
subito che se tira sù la tenda;
se vede Monti, Valli, e un Bosco in drento;
compatisse la zente reverenda,
se in quel liogo i farave el so convento.
Mercede pretesa dall’autore
Me lambico el cervello zorno, e notte
per far Sonetti grassi, e buttirosi,
per divertir le Donne, e i so morosi,
ma mi fazzo i Sonetti, e i altri fotte.
Dei me versi i se val, delle mie botte,
e con queste i se fà più coraggiosi,
e, co le sente versi lussuriosi,
ste Donne le và zò, come marmotte.
Mi, se voi Donne, hò da pagar ruffiani,
e i altri se diverte alle mie spese,
che i me versi ghe serve da mezzani.
Delle Mone, che i fotte in sto paese,
almanco, come che se dà ai Piovani,
la Decima i me dasse, o ’l mio Quartese.
Se Dio è per tutto, l’è anca in mona
Farse chiavar voleva una Puttana
da un Chiettinon de posta sul so letto,
con una man la ghe mostrava ’l petto,
con l’altra la se alzava la sottana.
La ghe diseva: tiò sta carne umana,
metti, cogion, el Cazzo in sto busetto,
mostrandoghe quel liogo benedetto,
dove se trova ’l zuccaro, e la mana.
Pensa ’l Chiettin, pò dise a quella Dona
che Dìo ne vede, e che per tutto ‘l xè;
la gà resposo: donca ’l xe anca in Mona.
Quando la xe cussi, donca dovè
darme una schiavazzada buzarona,
perché cussi con Dìo più v’uniré;
sù via donca chiavé.
Allora quel Chiettin buzaronazzo
gà messo drento tutto quanto ’l Cazzo;
e co quel visdecazzo
quel gusto cussì grando l’hà sentio,
l’hà dito: ah ti hà rason, che quà ghè Dìo.
